O día 22 de marzo do 2018 presentouse aos medios de comunicación de Galicia a Ruta Rosaliana, tras ser presentada en Fitur 2018.
Como novidade, a adhesión do Concello de Santiago de Compostela, polo que son catro, os concellos integrantes deste itinerario turístico – cultural.
Como primeira acción de consolidación da ruta, os catro concellos organizan un evento para o día 26 de marzo: “As Rosalías da Vida”. “As Pegadas de Rosalía”, novo itinerario da Ruta Rosaliana promovido e deseñado por Galicia es +.
A Ruta Rosaliana “As Pegadas de Rosalía”:
A Ruta Rosaliana “As Pegadas de Rosalía” toma como referencia a ruta deseñada polo intelectual Avelino Abuín de Tembra e está concibida para que os usuarios poidan percorrela de xeito inmediato en coche individual ou en autobús; e a medio-longo prazo contémplanse as liñas de traballo de deseñar itinerarios para realizar esta ruta en bicicleta ou a pé. Para iso, contan cun folleto e dun mapa que se poden descargar en PDF, así como dunha contorna web 360. 
Trátase dun itinerario circular que sae da Praza de Vigo (Santiago de Compostela), e chega ao Panteón de Galegos Ilustres en Santo Domingo de Bonaval, no mesmo concello; pasando por lugares como San Xoán de Ortoño (Ames), a igrexa de Bastavales (Brión), a colexiata de Iria Flavia (Padrón), o Pazo de Arretén (Padrón) e a Casa de Rosalía de Castro (Padrón).
“As pegadas de Rosalía” é un novo produto turístico e cultural que responde ás actuais demandas dos viaxeiros, como son a busca de inmersión en destino, o respecto á identidade do territorio, o contacto coa poboación local ou a protección do medio ambiente, entre outras. Cúmprese así o dobre obxectivo de sensibilizar a poboación local de Galicia achegando a figura dunha Rosalía viva; e mais o de dar a coñecer esta autora aos viaxeiros que chegan á nosa terra.
Noticias relacionadas: Concello de Ames
Promoción da Ruta Rosaliana
Este novo produto foi presentado en Fitur 2018, no stand da Axencia de Turismo de Galicia ao que acudiron varios profesionais do sector que xa mostraron interese na súa comercialización. Seguindo as liñas de promoción, os tres concellos fundadores (Ames, Brión e Padrón) e o Concello que agora se incorpora, Santiago de Compostela, organizan un evento para o día 26 de marzo, coincidindo co Día Mundial de Prevención contra o Cancro Uterino; enfermidade pola que morreu a protagonista, Rosalía de Castro.
“Rosalías da Vida”
O luns 26 de marzo na Casa Museo Rosalía de Castro en Padrón, a partir das 18.00 h. celebrarase este evento. Haberá dous pases de visitas teatralizadas á Casa Museo, ás 18.00 h e ás 19.00 h.; con inscrición previa por haber prazas limitadas (646593319 ou turismo@padron.gal); deseguido ás 20.00h. unha mesa redonda aberta aos asistentes con relatoras indentificadas como “As Rosalías da Vida”que representarán a todas esas mulleres que se senten “un pouco Rosalías”. Este último acto aberto ao público ata completar aforo.
